БИШКЕК, 3-ноя. — Sputnik. Кытай кыргыз-тажик чек арасындагы кандуу жаңжалда жабыркаган Баткен облусунун тургундарына гуманитардык жардам бөлөт. Бул тууралуу Тышкы иштер министрлиги билдирди.
Маалыматта 2-ноябрь күнү тышкы иштер министринин орун басары Азизбек Мадмаров Кытайдын Кыргызстандагы элчиси Ду Дэвень менен жолукканы айтылат.
"Кытай тарап кыргыз-тажик чек арасында жабыркаган Баткен облусунун тургундарына 100 миң долларлык гуманитардык жардам бөлүү чечимин кабыл алганын кабарлады", — деп жазылган билдирүүдө.
Тараптар Кытайдын тышкы иштер министри Ван Инин Кыргызстанга болгон сапары учурунда жетишилген макулдашууларды ишке ашырууну талкуулашкан.