"Айыл банк" эми өз кардарларына ислам принциби менен иш алып барган долбоорлорунун эшигин ачат. Анда алгач эле буюмду банк аркылуу алуу кредитин ишке киргизгени турабыз. Бул тууралуу Талант Керимбаев Sputnik Кыргызстан радиосуна маек куруп жатып билдирди.
Анын айтымында, аталган долбоорго кийинчерээк фермерлерге жеңилдетилген кредит берүү жана башка ушул сыяктуу мамлекеттик программалар кирет.
"Улуттук банктан ислам терезеси долбоорун "Айыл банкта" ишке киргизүү үчүн лицензия алдык. Бирок бул иш бүгүн эле башталып кетет дегенди түшүндүрбөйт. Юридикалык документтер, бухгалтериялык эсеп-кысаптар, техникалык жабдуулар али бүтө элек. Андыктан аталган долбоордун алгачкы кардарлары ушул жылдын аягында же 2023-жылдын башында гана ислам принциптеринин негизинде кредиттерди ала алышат. Алгач буюмду банк аркылуу алуу, бөлүп төлөө кредитин киргизсек, акырындап керектөөчү кредит, кийинчерээк мамлекет тарабынан белгиленген фермерлерге арзан насыя берүү сыяктуу программаларды да ушул ислам принциптеринин негизинде ишке ашыра баштайбыз", — деди Керимбаев.
Ал аталган иштер өкмөттүн 2016-жылы чыгарган "Мамлекеттик банктарда ислам принциптери менен кредиттөөнү киргизүү" токтомунун алкагында ишке ашып жатканын кошумчалады.