БИШКЕК, 2-ноя. — Sputnik. Россия өзүнө маалыматтык-психологиялык ыкманы камтыган маалыматтык агрессияга дуушар болууда. Бул тууралуу Россия ТИМинин расмий өкүлү Мария Захарованын айтымына таянып Sputnik радиосу билдирди.
Эскерте кетсек, бүгүн Москвада "Россия сегодня" эл аралык медиаборборунда КМШ мамлекеттеринин "Өзгөрүп жаткан ааламдагы медианын өнүгүшү" деп аталган медиафоруму башталды.
"Бул эч кандай таасир эмес. Бул бир катар компоненттерден турган чыныгы агрессия. Бул жерде фейктерден тышкары туура эмес маалыматтар да тарап жатат. Биздин "душмандар" маалыматтык-психологиялык ыкманы колдонууга өтө баштады", — деген ал.
Захарованын айтымында, бүгүнкү күнү маалыматтык согуштун ыкмалары да татаалдашып, радикалдуу боло баштады. Ал жыл сайын интернетте тараган фейктердин саны өсүп бара жатканын да белгилеген.
"Бул — маалыматтык согуш жүргүзүүнүн инструменти. Бүгүнкү күнү жеке маалыматтарды колдонуу, опуза, коркутуулар колдонулууда. Эч кандай чек жок. Мунун жыйынтыгында адам көнгөн чөйрөдөн тыш калат", — деген ал.
"Россия сегодня" медиатобу Санариптик өнүктүрүү, байланыш жана массалык коммуникациялар министрлигинин колдоосу менен аталган медиафорумдун уюштуруучусу болуп саналат.