Академия "Манас жана Чыңгыз Айтматов улуттук академиясы" деп аталып жаңы түзүлгөндө эле эки феноменди бириктирип мекеме ачууга каршы пикирин билдиргендер болгон. Мезгилдин өтүшү менен бүгүнкү күндө ошол каршы болгон пикирлер жүйөлүү экенине ынанып отурабыз. Ошондуктан "Манас" улуттук академиясынан Чыңгыз Айтматов бөлүмүн Улуттук илимдер академиясынын Чыңгыз Айтматов атындагы Тил жана адабият институтуна өткөрүп бердик. Бул тууралуу Талантаалы Бакчиев Sputnik Кыргызстан радиосуна маек куруп жатып билдирди.
Анын айтымында, академиянын Чыңгыз Айтматов бөлүмү жоюлганы менен штаттык бирдиги, бюджети өзгөрбөйт жана Айтматов таануу жаатында буга чейин жасалган эмгектер өзүндө калат.
"Манас" улуттук академиясынын Чыңгыз Айтматов бөлүмүнүн залкар жазуучунун атын алып жүргөн Тил жана адабият институтуна өткөрүп берилгени улуттук академия кичирейип калды дегенди түшүндүрбөйт. Анткени штаттык бирдиги, бюджети өзгөргөн жок. Башкача айтканда, Айтматов таануу боюнча жүргүзүлүүчү иштер, милдеттер, озуйпасы гана өттү. Бул эки чоң, бири-биринен айырмаланган феномендерди бириктирип академия ачуу өзү туура эмес болгон. Эми "Манас" улуттук академиясынын алдында эпос таануу илимий борбору ачылууда. "Манас таануу" десек болот эле, бирок аталыш эки ирет кайталанып калбасын дедик. Муну менен катар кенже эпосторду изилдеп, жайылтууга да жол ачылып жатат. "Эр Төштүк" эпосунун энциклопедиясын даярдап жатабыз. Көлөмдүү эмгек болгону турат. Мындан сырткары, "Кожожаш", "Жоодарбешим", "Эр Табылды" жана башка кенже эпостордун дагы энциклопедиясын чыгарганы турабыз", — деди Бакчиев.
Манасчы аталган иштер ушул жылдын апрель айында чыккан өлкө башчынын "Кыргыз элинин материалдык эмес маданий мурастарын изилдөө институту Манас жана Чыңгыз Айтматов улуттук академиясынын алдында түзүлсүн" деген жарлыгынын негизинде ишке ашып жатканын кошумчалады.