БИШКЕК, 1-ноя. — Sputnik. Бишкекте биринчи Дельфи оюндары жыйынтыкталды.
Иш-чарага Кыргызстандын, Казакстандын, Россиянын жана башка өлкөлөрдүн көрүнүктүү маданият, искусство, билим жана илим ишмерлери катышты.
Анын жыйынтыгы боюнча ардак медалдар жана дипломдор 96 катышуучуга жана 13 командага тапшырылды.
Алардын ичинен алтын медаль 16 солист жана 14 адамдан турган бир командага берилди. Күмүш медаль 18 солистке жана 108 адамдан турган төрт командага, коло медаль 16 солистке жана эки командага ыйгарылды. Ошондой эле 46 солистке жана алты командага дипломдор тапшырылды.
Бүгүн Дельфи оюндарынын жыйынтыгы боюнча тегерек стол болгон. Анда Дельфи кыймылынын өнүгүү тенденцияларын болжолдоо жана улуттук маданият менен искусствонун артыкчылыктарынын динамикасын аныктоо маселеси каралган.
Иш-чара КМШнын алкагындагы Дельфи оюндарынын 20 жылдыгына арналган. Долбоордун максаты — искусствонун, чыгармачылыктын, аткаруучулук жөндөмдүн ар кыл тармактарында фестивалдык өнөр жарышы үчүн жергиликтүү тажрыйбанын алкагында таланттуу жаштарга шарт түзүү. Маданий көп түрдүүлүккө көмөк көрсөтүү. Эл аралык аянтчаларда жогорудагы тармактардагы жаш лидерлерди табуу жана алардын өсүп чыгышына жол салуу.