БИШКЕК, 31-окт. — Sputnik. Мамлекет башчы Садыр Жапаров бүгүн, 31-октябрда, Абу-Даби шаарында Бириккен Араб Эмираттарынын (БАЭ) президенти, шейх Мухаммед бин Заед Аль Нахайян менен жолукту. Бул туурасында анын маалымат кызматынан кабарлашты.
Президенттер эки өлкөнүн ортосундагы алака-катышты өнүктүрүүнүн келечегин, соода-экономикалык, билим берүү, гуманитардык, инвестициялык жана башка эки тарапты кызыктырган чөйрөлөрдөгү кызматташтыкты арттыруу маселелерин талкуулаган.
"Мухаммед бин Заед Аль Нахайян Жапаровду жылуу кабылдап, анын иш сапары натыйжалуу жана ийгиликтүү болоруна жана бир катар эки тараптуу документтерге кол коюу өз ара пайдалуу кызматташтыктын бардык чөйрөлөрүндө мамлекеттер ортосундагы мамилелерди чыңдоого жардам берерине бекем ишенерин билдирди", — деп айтылган маалыматта.
БАЭ президенти Кыргызстан менен өз ара кызматташууга кызыкдар экенин айтып, соода жүгүртүү көлөмүн көбөйтүү боюнча биргелешкен иштерди жандандырууну сунуштап, буга бүгүнкү кол коюлуп жаткан документтер көмөкчү болорун кошумчалаган.
Мухаммед бин Заед Аль Нахайян эки өлкөнүн соода-экономикалык карым-катыш чөйрөсүндө чоң мүмкүнчүлүктөрү бар экенин белгилеп, эмират тараптын Кыргызстан менен биргелешкен кызматташууну өнүктүрүүгө даяр экендигин айткан.
Жапаров Кыргызстан менен БАЭнин ортосундагы мамилелер өз ара ишенимге жана достукка негизделип, эки элди тарыхый жана руханий байланыштар бириктирип турганын баса белгилеген.
Ал эки өлкөнүн эл аралык айдыңда эч кандай карама-каршылыгы жок экенин билдирип, Бириккен Араб Эмираттары Кыргызстандын Жакынкы Чыгыштагы жана Булуң аймагындагы негизги соода өнөктөшү экенин кошумчалаган.
Жапаров эки мамлекеттин ортосундагы соода көлөмү 2020-жылдын 8 айында 69 миллион долларды түзгөнүн айтып, ал жыл сайын өсүп жатканын, тараптар мындай жакшы динамиканы келерки жылдарда күчөтө алышарын баса белгилеген.
"Соода-экономикалык алакадагы жана башка жакшы саамалыктарды атап: быйыл БАЭге экологиялык таза этти жана ичүүчү таза сууну экспорттоо башталганын, жакын арада Дубай жана Ош шаарларынын ортосунда түз авиакаттам ачуу мерчемделип жатканын, туризм тармагында сезилерлик өнүгүү бар экенине токтолду", — деп айтылат маалыматта.
Президент Садыр Жапаров БАЭдеги инвесторлорду Кыргызстанда аймактык авиахаб түзүү боюнча долбоорлорду, ошондой эле гидроэнергетика тармагындагы долбоорлорду биргелешип ишке ашырууга чакырды. Мындан сырткары, Кыргызстандын туристтик мүмкүнчүлүктөрү тууралуу сөз болгон.
Жапаров шейх Мухаммед бин Заед Аль Нахайянды өзүнө ыңгайлуу мезгилде Кыргызстанга иш сапар менен келип кетүүгө чакырган.
Президенттер биргелешип иш алпаруунун күн тартибинин бардык багыттары боюнча өз ара алака-катышты тереңдетүү үчүн жогорку деңгээлдеги жигердүү саясий диалогду улантууга макулдашкан.
Эске салсак, Жапаров БАЭге 30-октябрда кеткен.