БИШКЕК, 31-окт. — Sputnik. Бүгүн президент Садыр Жапаров Абу-Даби шаарында Бириккен Араб Эмирлигинин (БАЭ) президенти, шейх Мухаммед бин Заед Аль Нахайян менен жолугушуп, натыйжада өнөктөштүктү тереңдетүүгө багытталган бир катар документтерге кол коюлганын өлкө башчынын маалымат кызматы билдирди.
Анда Кыргызстанда биргелешкен холдинг компаниясын түзүү боюнча эки өлкөнүн өкмөттөрүнүн ортосунда макулдашуу түзүлгөнү айтылат.
Макулдашууда:
КР өкмөтү менен БАЭ өкмөтүнүн ортосунда дипломатиялык паспорттордун ээлерин виза талаптарынан бошотуу тууралуу өз ара түшүнүшүү жөнүндө меморандумга өзгөртүүлөрдү киргизүү жөнүндө ноталар менен алмашуу;
КР Жаратылыш ресурстары, экология жана техникалык көзөмөл министрлиги менен БАЭнин Климаттын жана айлана-чөйрөнүн өзгөрүшү боюнча министрлигинин ортосундагы айлана-чөйрөнү коргоо тууралуу өз ара түшүнүшүү жөнүндө меморандуму;
Бишкек шаары менен Абу-Даби шаарынын ортосунда боордоштук байланыштарды түзүү жөнүндө макулдашуу;
КР Улуттук коопсуздук мамлекеттик комитети менен БАЭнин Киберкоопсуздук кеңешинин ортосундагы өз ара түшүнүшүү меморандуму;
Эки өлкөнүн Финансы министрликтеринин ортосундагы өз ара түшүнүшүү жана кызматташтык жөнүндө меморандуму;
КР Улуттук банкы менен БАЭнин Борбордук банкынын ортосундагы өз ара түшүнүшүү жөнүндө меморандуму;
КР Дин иштери боюнча мамлекеттик комиссиясы менен БАЭнин Ислам иштери жана вакфтар боюнча башкы агенттигинин ортосундагы өз ара түшүнүшүү жөнүндө меморандуму бар.