БИШКЕК, 30-окт. — Sputnik. Кыргызстанда кант диабети менен ооругандардын саны жылына 5-7 миң бейтапка көбөйүүдө. Бул тууралуу Саламаттык сактоо министрлигинин Республикалык ден соолукту чыңдоо борбору маалымдады.
Анда жазылгандай, диабет дүйнө жүзүндө эң көп жайылган өнөкөт оорулардын катарына кирди. Дүйнөдө ар бир 15 жылда кант диабетине кабылгандар эки эсеге көбөйүп келет.
"Диабет — залалдуу илдет. Ал адамды майып кылышы да мүмкүн. Бейтаптын көрүүсү начарлап, бөйрөк, жүрөк ооруларына, инсультка алып келет, кээде бутун же колун кесип салууга аргасыз болушат. Дүйнөдө жылына 1 миллион бейтап диабеттен улам колунан же бутунан ажырайт, 700 миң жашоочунун көзү көрбөй калат. Ар бир 7 секунда сайын аталган илдеттен бир адам көз жумат", — деп жазылат борбордун маалыматында.
Кыргызстанда кант диабети менен 74 миң 810 адам каттоого алынган. Көпчүлүк бул ооруга кабылганын билбей жүрө берет, билгендердин айрымдары оору менен күрөшүүдөгү эрежелерди так сакташпайт.
"Диабет менен ооруган адамдарды аныктоо жана аларга оору менен күрөшүү жолдорун түшүндүрүү максатында ушул жылдын жаз мезгилинде Саламаттык сактоо министрлиги ДСУнун Европа аймактык бюросу менен биргеликте "Кыргызстанда биринчи медициналык жардамдын деңгээлинде жугуштуу эмес оорулардын алдын алуу жана көзөмөлдөө" долбоорун баштаган. Анын алкагында сынамык негизинде Токмок шаарындагы жана Аламүдүн районундагы 72 дарыгер, 122 медайым окутулууда", — деди борбордон.
Маалыматта жыл сайын 14-ноябрда Кант диабети менен күрөшүүнүн бүткүл дүйнөлүк күнү белгиленери айтылган. Адистер диабетти аныктоо үчүн канды үч жылда бир жолу тапшырып турууну сунушташат. Ага кабылуу тобокелчилиги чоң экенин сезгендер кандагы кантты жыл сайын текшергени туура.
Тобокелдик факторлору:
40 жаштан жогоркулар;
ашыкча салмак менен жүргөн жарандар, денени май басып кетүү;
жакындары бул илдет менен ооругандар.