БИШКЕК, 28-окт. — Sputnik. Россия президенти Владимир Путин Батышка жаңы дүйнө түзүлүшү тууралуу сүйлөшүүлөр эми Москва койгон шарттын негизинде жүргүзүлөрүн эскертти. Бул тууралуу Daily Mail басылмасынын баяндамачысы Крис Плезанс жазган.
Белгилей кетсек, Путин 27-октябрь күнү "Валдай" эл аралык дискуссия клубунун XIX жыйынында "Гегемониядан кийинки дүйнө: акыйкаттык жана коопсуздук" темасындагы талкууда сүйлөгөн.
Плезанс өлкө башчынын дүйнө Экинчи дүйнөлүк согуштан кийинки эле эң бир кооптуу учурга баш бакканы тууралуу айтканын жана Москванын пикири баалана турган жаңы дүйнө түзүлүшүн түптөө боюнча чакырык таштаганын эске салды.
"Путин негизинен Россия "Батышка душман эмес" экенин, болгону "эркин өнүгүү үчүн укугун" коргоп жатканын айтты. Муну менен президент "жаңы түзүлүш" тууралуу кандай гана сүйлөшүүлөр болбосун, баары тең Москванын шартында өтөрүн билдирди", — деп жазган баяндамачы.
Путин өз сөзүндө Россия эч убакта батыш мамлекеттерине кас болбогонун, бирок бул өлкөлөр Москваны өз максатына жетүү үчүн курал катары пайдаланууну көздөп келерин белгилеген. Анын айтымында, Россия башка мамлекеттердей эле мындай ролго макул эмес.
Президент "биз өзүбүз гегемон болууга же Батыштын үстөмдүгүн Чыгыштын, Түштүктүн, Түндүктүн үстөмдүгүнө алмаштырууга умтулбайбыз" деди. Анын пикиринде, чыныгы демократиянын өзөгүн ар бир мамлекеттин өнүгүү моделин тандоо укугун сактоо түзөт, ал эми Батыш альтернативадан коркуп келет.