Сынакка Кыргызстан, Казакстан жана Өзбекстандан 50 адам катышты. Анын арасынан биринчи сыйлыкка ээ болгон Кубаныч Атамбаев менен маек курдук.
Жеңүүчүнүн ырдаганын угуп жатып бала чагынан такшалган, атайын музыкалык мектепте окуган жигит го деген ой келди. Классикалык жанрда ырдагандардын көбү талантын кичине кезинен тартып таптайт эмеспи. Бирок Кубанычтын жашоосу башкача болуп чыкты.
"Мен Бишкекке электрик болом деп келгем. Бул багытта атайын кесиптик лицейге тапшырып, үч жыл окудум. Ага чейин бир да жолу ырдап көргөн эмесмин, ырдай алам деген ой да келген эмес. Студент кезде бий ийримине кошулуп калдым, кечкисин түрдүү концерттерге барып бийлеп жүрдүк. Ошол учурда эмнегедир ырдагым келгенин сездим, кызыга баштадым. Кафе, ресторандарда ырдап жүргөн досторум бар эле, ошолордон ырдоо техникасын сурап жүрүп ырдап кеттим", — деди Атамбаев.
Ошентип жүрүп билимдүү, классикалык ырлардын профессионал аткаруучусу болууну чечкен. Мындан улам азыр Улуттук консерваторияда экинчи курста окуйт.
"Менин ырдаганымды уккандар үнүң Болот Миңжылкыевдикине окшош экен, өзүң да окшошуп кетесиң деп алкашат. Мындай жылуу сөздөрдү уккан сайын эл аралык деңгээлдеги мыкты ырчы болууга канат бүтөт", — деген Атамбаев декабрь айында Москвада боло турган "Романсиадалар" финалына даярданып баштады.
Жыл сайын уюштурулуп келген конкурс быйыл алтынчы ирет өттү. Бул аралыкта Кыргызстан, Казакстан, Өзбекстан жана Тажикстандан 300дөн ашык аткаруучу катышкан. Конкурстук угууларга жана гала-концертке жалпысынан беш миңден ашуун көрүүчү келген.
Тема боюнча: