БИШКЕК, 26-окт. — Sputnik. Жаш-карысына, аял-эркегине карабай мыйзам алдында баары бирдей жоопко тартылат. Бул тууралуу башкы прокурордун орун басары Турусбек Ишеналиев парламентте билдирди.
Учурда укук коргоо органдары массалык камоолор боюнча депутаттарга маалымат берип жатат.
"Мыйзамда аял-эркекти бөлүп кароо, жеңилдик берүү барбы? Адамдын жашына карап жеңилдетүү болобу, 60-70 жаштан өткөндөргө өзүнчө мамиле жасалбайбы?" — деп сурады депутат Балбак Түлөбаев жыйында.
Ишеналиев мыйзамдын алдында баары бирдей экенин, эч ким өзүнчө каралбай турганын айтты. Эгер кармоо учурунда процессуалдык мыйзамдар бузулса чара көрүлөрүн, бирок сот азыркы аракеттерди мыйзамдуу деп тапканын белгиледи.
Ал эми Жаза аткаруу кызматынын төрагасынын биринчи орун басары Кемел Садыков кармалган жарандардын абалын сурап чыкканын, бири да ден соолугуна жана башка жагдайларга байланыштуу даттанбаганын билдирди.
Андан соң депутат Жалолидин Нурбаев "71 жаштагы Асия Сасыкпаева өңдүү улгайган аялдарды үй камагына чыгарса болобу?" деп сурады.
Ички иштер министринин орун басары Эркебек Аширходжаев маселе соттун чечимине жараша караларын айтып койду.
Белгилей кетсек, 23-октябрда милиция бир катар саясатчы, жарандык активисттердин үйлөрүн массалык түрдө тинтүүгө алып, өздөрүн кармап кеткен. ИИМ Кылмыш-жаза кодексинин 36 ("Кылмышка даярдык көрүү") жана 278-беренеси ("Массалык башаламандыктарды уюштурууга даярдануу") боюнча кылмыш иши ачылганын билдирди. Кармалгандар Кемпир-Абад суу сактагычынын Өзбекстанга берилишине каршы позициясын билдирип келишкен.
Натыйжада кармалган 21 жаран тергөө абагына киргизилген.
Бул окуя боюнча президент Садыр Жапаров үн катып, жарандык коомдук өкүлдөрү менен сүйлөшүү натыйжа бербегенин айткан.