БИШКЕК, 26-окт. — Sputnik. Кыргызстан Түркмөнстандан электр энергия жана газ алуу боюнча сүйлөшүп жатканын энергетика министри Таалайбек Ибраев парламентте билдирди.
Аткаминер өткөн жумада эле Ашхабадга барып макулдашып келгенин айтты.
"Учурда келишимдин процедуралары жүрүп жатат. Түркмөнстандан 2 миллиард киловатт саат электр энергиясын алууга макулдашып келдим. Азыркы күндө 300 миллион куб газ алуу боюнча сүйлөшүүлөр жүрүп жатат. Биз өзүбүздүн бааны сунуштадык", — деди Ибраев.
Ошондой эле ал биринчи орун басары баасын такташуу үчүн кайра Ашхабадга кеткенин кошумчалады.