БИШКЕК, 21-окт. — Sputnik. Кыргызстан Камбар-Ата-1 ГЭСин куруп алгандан кийин электр энергиясын Европага чейин сатса болот. Бул тууралуу президент Садыр Жапаров Нарындагы Куланак ГЭСинин курулушуна капсула салуу учурунда билдирди.
Мамлекет башчы жакынкы келечекте көптөгөн орто жана чакан ГЭСтердин курула турганын белгилеген.
"Биз эки жылдан бери көп эле курулуштарга капсула салып келе жатабыз. Алар өз убагында бүткөрүлүүдө. Жазында Камбар-Ата ГЭСине да капсула салганбыз. Аны, буюрса, сегиз жылда бүтөбүз деп турабыз. Сегиз эмес он жылда бүтсөк да чоң иш болот", — деди Жапаров.
Ошондой эле ал Камбар-Ата-1 ГЭСинин курулушунун аякташы менен Кыргызстан көз карандысыз, өзүн-өзү камсыздаган, электр кубатын экспорттогон өлкөгө айланарын белгилеген.
"Азыр бизде жылына 3 миллиард киловатт-саат электр энергиясынын таңкыстыгы бар. Суунун башында турабыз, бирок ошону колдонуп, отуз жылдан бери бир дагы ГЭС салбаптырбыз. Эми кура баштадык. Бардык потенциалдын он эле пайызын колдонот экенбиз. Эгерде дагы 90 пайызын кошуп колдонсок, биз Орто Азия эмес, Европа, Кытайга электр энергиясын сатсак болчудай. Кудай бурса ага да жетебиз", — деди президент.
Аталган долбоор Камбар-Ата ГЭС каскадынын курамындагы эң ири энергетикалык объект болуп саналат. Анда 256 метр бийиктикте аска таш төшөлгөн, сыйымдуулугу 5,4 миллиард метр куб суу сактагычы бар ГЭСти курууну камтыйт. Биринчи гидроагрегатын ишке киргизүү туруктуу каржылоо болгон шартта төрт жылда ишке ашмакчы. Курулушка даярдык көрүү үчүн быйыл республикалык бюджеттен 1,5 миллиард сом бөлүнгөн.