БИШКЕК, 21-окт. — Sputnik. ЕАЭБге мүчө мамлекеттердин экономикасы тышкы өзгөрүүлөргө ыңгайлашып калган. Бул тууралуу Россиянын премьер-министри Михаил Мишустин билдирди.
Ал Армениянын Ереван шаарында өткөн өкмөт башчылардын жыйынында сүйлөдү. Мишустин Россиянын президенти Владимир Путиндин буга чейин айткан сөзүн эске салды. Анда Путин ЕАЭБдеги биргелешип иштешүү план боюнча жана системалык негизде курулуп жатканын белгилеген.
"Дал ушул ыкма жана каатчылыкка каршы ыкчам чараларды натыйжалуу ишке ашыруунун арты менен экономиканын ар кандай тышкы кырдаалдарга ыңгайлашуусуна жетиштик. Биринчи кезекте транспорттук-логистикалык чынжырлардын бузулушун жана экспорттук-импорттук агымдардын өзгөрүшү тууралуу айтып жатам", — деген ал.
Премьер-министр буга статистикалык маалыматтар далил экенин белгилеген.
"Биринчи жарым жылдыктын жыйынтыгы боюнча ички дүң продукция бир триллион долларга өскөн. Негизги капиталга инвестиция 6,5 пайыздан ашык жогорулап, курулуш иштеринин көлөмү 3,5 пайызга жогорулады", — деген ал.
Мишустин эми бул тенденцияны экономика, соода, технология, инновация сыяктуу бардык тармакта бекемдеп, көтөрүү керектигин кошумчалаган.