БИШКЕК, 20-окт. — Sputnik. Статистика боюнча улуттук комитетинин төрагасы Бактыбек Кудайбергенов Кыргызстанда эмне себептен эркек балдар көп төрөлүп жатканын айтты.
Парламентте депутат Элвира Сурабалдиева соңку жылдары өлкөдө кыздарга караганда балдар көбүрөөк төрөлүп жатканын, мындай статистика кайсы жылы башталганын сурады.
"Дайыма эле ушундай, биздин менталитетке байланыштуу", — деп жооп берди Кудайбергенов.
Мындан улам Сурбалдиева эгер мындай темп менен кете берсе кыздар тартыш болуп каларын айтты.
Сурабалдиева төраганын сөзүн кубаттап, уулдун төрөлүшүн каалагандар көп болгондуктан кээ бир келиндер кыз болуп калса боюнан алдырып саларын кошумчалады. Бул тууралуу БУУнун Аялдар (UN Women) структурасынын отчётунда да жарыяланганын белгиледи.
© Фото / пресс-служба Жогорку Кенеша
"Менталитетке байланыштыра бербей, түшүндүрүү иштерин жүргүзүү керек, антпесе 50 жылдан кийин Кытайдагыдай болуп кыздардын саны жетишпей калышы мүмкүн", — деген пикирин кошумчалады депутат айым.