БИШКЕК, 19-окт. — Sputnik. Жогорку Кеңештин депутаты Марлен Маматалиев Sputnik Кыргызстандын маалымат борборундагы брифингде оң рулдуу автоунаалар өлкөгө контрабанда жолу менен кандайча ташып келинип жатканын айтып берди.
Ал автокөлүктөрдү өткөн дата менен, тагыраагы, тыюу салуу киргизилген 2015-жылга чейинки убакыт менен каттаган учурлар бар экенин билдирди.
"Мунун баары коррупциялык схема. Тетик катары алып келишет да Кыргызстанда курашат. Үч жылга алып келген автоунаалар (ишеним каттын мөөнөтү — ред.) бул жерде калат. Сөзсүз түрдө эле аны алгач Арменияга алып келиш керек эмес. Факт мындай: документти машина ал жакка барып, андан соң бул жерге келгендей кылып толтурушат", — деди Маматалиев.
Парламентарий оң рулдуу автоунааларды ташып келүүгө же жылчыксыз кылып таптакыр тыюу салууну, же кайсы бир убакытка чейин уруксат бере турууну айтты. Уруксатты бир жылга чейин созуп туруу — альтернативдүү вариант, себеби министрлер кабинети чектөөнү таптакыр алып салууга макул эмес.
Парламентарийдин айтымында, эгерде оң рулдууларды ташып келүүгө уруксат берилсе, ЕАЭБ койгон тарифтерден айланып өтө албай калат.
"Эгерде макул болушса, тарифти кошкондо деле Япониядан автоунаа Европа же башка мамлекеттерге караганда арзаныраак келет. Анын үстүнө бул өлкөнүн темир тулпарлары сапаттуу", — деди депутат.