БИШКЕК, 19-окт. — Sputnik. Бийлик өлкөгө темир тулпарларды ташып келүү боюнча маселени чечүүдө эки вариантты колдоп жатат. Бул тууралуу Жогорку Кеңештин депутаты Марлен Маматалиев Sputnik Кыргызстандын маалымат борборундагы брифингде билдирди.
Эл өкүлү министрлер кабинетинин жетекчиси рулду кайра орнотуп алуу вариантын колдой турганын жана бул иштер сапаттуу жасалышы үчүн техникалык жактан тейлеген үч заводдук станция курууга даяр экендигин белгиледи.
"Андан сырткары, министрлер кабинети чыгымдарды өзүнө алат, айдоочулардан тетиктер гана талап кылынат. Жашырганда эмне, бул вариантты карап көрүүнү президенттин өзү сунуштады. Биз орток бир пикирге келүү үчүн министрлер кабинетинин башчысынын орун басары Бакыт Төрөбаев менен сүйлөшүүлөрдү жүргүзүп жатабыз. Депутаттар арасында оң рулдуу автоунааларды ташып келүү колдоого алынууда, бирок арасында каршы чыккандар да бар", — деди парламентарий.
Ал рулду башка жагына орнотуунун тобокелдиктерин эске салып, аны бардык автоунааларга жасоого мүмкүн эместигин айтты.
Министрлер кабинети колдогон, маселени чечүүнүн экинчи варианты — ташып келинген автоунааларды, анын ичинен кыргызстандыктар алып кирип, бирок каттай албай жаткан чет элдик номерлүүлөрдү мыйзамдаштыруу.
Депутат үчүнчү вариантты өзү сунуштады: оң рулдуу автоунааларды кайсы бир убакыт ичинде алып кирүүгө уруксат берүү. Анын айтымына караганда, ЕАЭБ аймагында Армения менен Россияга оң рулдуу автокөлүктөрдү ташып кирүүгө салынган тыюу жок. Эл өкүлүнүн боолголоосунда, бул жерде Жол кыймылы коопсуздугун камсыздоо боюнча башкы башкармалык чаташтырып алган сыяктуу.
"Жеңил автоунааларды ташып кирүүгө тыюу салынган эмес, автобустарга чектөө бар. Рулду автоунаанын башка тарабына орнотуп алуу заводдук кайсы бир талаптарда уруксат берилет", — деди Маматалиев.
Анын айтымына караганда, оң рулдуу темир тулпарларды ташып келүүгө 2015-жылдан бери тыюу салынса да өлкөгө контрабанда менен кирип жатат. Кээ бир учурларда тетиктерин алып кирип, Кыргызстандын аймагынан курап чыгышат.
"Мыйзам иштебегенден кийин элди кыйнап эмне кереги бар? Оң рулдуу автоунаалардын чыккан жылы да жаңы, бул эскилерин алганга караганда жакшы эмеспи. Андыктан жарандар эл тетикке акчасын кетирбеши жана сапаттуу транспортто жүрүшү үчүн бир жылдан бери Япониядан оң рулдуу темир тулпарларды ташып кирүү сунушталып келе жатат", — деди Маматалиев.