БИШКЕК, 19-окт. — Sputnik. Баткен районунун Ак-Сай айылында тажик тараптын кол салуусунан каза болгон тоок ферманын кожоюну Матиса Надировдун 9 миллион сомдук насыясы жоюлду. Бул тууралуу министрлер кабинетинин төрагасы Акылбек Жапаров парламентте билдирди.
"Ак-Сай айылынын четинде кичине тооккананы миллиондук чоң ишканага айландырган ишкерибиз, тилекке каршы, каза болду. Бирок анын баласы бар экен. Ишкердин банктардан алган 9 миллион сомдук үч кредитинин баарын кечип бердик. Ошондой эле мындан дагы чоң ферма куруш үчүн каржылык жардам көрсөтө баштадык. Атасынын ишин баласы улантып кетсин деп тилек кылып жатабыз", — деди Жапаров.
Мындан сырткары, өкмөт башчы чек арадагы кагылыштан жабыркаган 252 адамдын кредити кечилгенин, 13 насыя реструктуризациялана баштаганын белгиледи. Бул жумуш мындан ары дагы улантылат.