БИШКЕК, 18-окт. — Sputnik. Республикалык ден соолукту чыңдоо борбору алкоголдук ичимдиктердин ден соолукка, жашоого, өмүргө тийгизген таасирлерин тизмектеп, адамдын ага берилип кеткен факторлорун атады.
Алкоголдук ичимдикти дайыма колдонуу — ага байланып калууга түртүп, андан сырткары, адамды бир топ ооруга кептейт. Мисалы, адамдын психикасы бузулат, боор циррозуна, залалдуу шишиктин айрым түрлөрүнө, жүрөк-кан тамыр ооруларына, дагы бир топ башка илдеттерге чалдыгышы мүмкүн.
"Ашыкча ичип алганда ден соолукка, өмүргө атайылап же капыстан зыян келтирген учурлар арбын. Алар: мас болуп автоунаа айдоо, жол кырсыктарына кабылуу, мушташуу, адамдын өз жанын кыюусу, зордуктоо жана башка бир катар кесепеттүү көрүнүштөр. Ичимдикти ашыкча ичүү ВИЧ жана кургак учуктун инфекциялык ооруларынын жугушун жана алардын тездик менен өнөкөткө айланышын шарттай турганы аныкталган. Кош бойлуу аялдын "сеп этип" алып жүргөнү түйүлдүктү ар кандай ооруларга, ара төрөлүү коркунучуна кептейт", — деп жазылат маалыматта.
Ден соолукту чыңдоо борбору адамдарды жагымсыз бул затка түрткөн факторлорду тизмектеген.
"Ага адамдын экономикалык абалы, маданий аспектилер, социалдык нормалар, алкоголдун жеткиликтүүлүгү, жаш курак, адамдын жынысы, үй-бүлөдөгү абал жана башкалар кирет. Кээ бирлери бул факторлор канча таасирдүү болбосун ичимдикке жолобойт, кээде адамда бул факторлор кездешпегени менен ал жан дүйнөсүндөгү көйгөйлөрүнүн алдында алсыз, ал канчалык алсыз болсо ичимдикке берилип кетүүсү ошончолук тез жана оңой болот. Ичимдиктин кесепетин бакубат жашагандарга караганда жакыр үй-бүлөлөр көп тартары аныкталды", — деп айтылган маалыматта.
Мындай зыяндуу адаттан каза болгондордун 7,7 пайызын эркектер, 2,6 пайызын аялдар түзөт. 2016-жылы адистер дүйнө жүзүндөгү колдонулган алкоголдук ичимдиктерди бөлүп эсептей келгенде, ар бир эркек кишиге 19,4 литрден, ар бир аялдын башына 7 литрден туура келген", — дешти аталган борбордон.