БИШКЕК, 15-окт. — Sputnik. "Жашыл мурас" улуттук компаниясынын алкагында күзгү көчөт отургузуу акциясы Нарын облусунан башталды. Бул тууралуу Айыл чарба министрлиги билдирди.
Маалыматка ылайык, Нарын токтой чарбасынын "Кара-Тал" токой бөлүгүнүн "Байболот" тилкесинде үч гектардан ашык аянтка 950 түп "Тянь-Шань" карагайы отургузулган.
Акцияга катышкан айыл чарба министри Аскарбек Жаныбеков өлкө аймагында токой баскан аянттарды көбөйтүү максаты мөңгүлөрдүн кескин түрдө азайышына каршы күрөш экенин белгилеген.
"Жашыл мурас" акциясынын алкагында өлкө боюнча 6 миллион түп көчөт отургузуу пландалган. Жазында 4 миллион 600 миң көчөт тигилген. Эми күзгү бак-дарак отургузуу акциясын Нарындан баштап, Баткенден бүтүрөбүз. Анда жалпы 1 миллион 500 миңдей көчөт тигебиз. Күзүндө отургузулган көчөт жазында өсүп кетишине жакшы шарт түзүлөт", — деди Жаныбеков.
Акцияга Нарын токой чарбасынын кызматкерлери, райондук жетекчилер, Нарын мамлекеттик университетинин студенттери тартылган.
Мындан сырткары, бүгүнкү күндө Токой чарбаларынын питомниктеринде 13 миллиондон ашык түп көчөт бар экени белгиленди.