БИШКЕК, 14-окт. — Sputnik. Президент Садыр Жапаров Кыргызстан КМШдагы төрагалыгынын алдында жасалчу артыкчылыктуу милдеттерин билдирди.
Мамлекет башчы бүгүн Астанада КМШга мүчө-мамлекет башчыларынын кеңешинин тар курамдагы жыйынында сүйлөдү. Анда үстүбүздөгү жылы Казакстан КМШга ийгиликтүү жана жемиштүү төрагалык кылганын баса белгиледи.
"2023-жылдын 1-январынан тарта КМШга төрагалык кылуу Кыргызстанга өтөт. Кыргыз тарап бул учурда КМШ мейкиндигинде интеграциялык түзүмдөрдүн өз ара иштешүүсүн тереңдетүү, ынак коңшулук жана ишенимдүү мамилелерди чыңдоого өзгөчө көңүл бурат. Климаттын өзгөрүшү, жаратылышты коргоо, экология, коопсуздук жана туруктуу өнүгүү маселелери — артыкчылыктуу милдеттер. Бул өңүттө курчап турган чөйрөнү коргоо жана экологиялык таза технологияларды жайылтуу, жашыл экономиканын үлүшүн көбөйтүү жаатында биргелешкен долбоорлорду ишке ашыруу максатында эл аралык институттар менен активдүү диалогду түзүү зарыл", — деди Жапаров.
Ошондой эле президент КМШ өлкөлөрүнүн ортосундагы транспорт, коммуникация, миграция саясаты, маданий-гуманитардык кызматташтык, эл аралык демилгелерди жана мамлекеттер аралык программаларды ишке ашыруу сыяктуу тармактарда өнөктөштүк мамилелерди өнүктүрүүгө күч-аракеттерди жумшоо маанилүү экенин белгиледи.
Аны менен катар Кыргызстан мыйзамдарды ар кандай чөйрөлөрдө жакындаштыруу максатында КМШ өлкөлөрүнүн парламенттер аралык кызматташтыгын чыңдоого умтуларын айтты.