БИШКЕК, 14-окт. — Sputnik. Президент Садыр Жапаров "Россия — Борбор Азия" саммитиндеги сөзүндө аталган аймак жана РФтин ортосундагы мамилелерди өнүктүрүү Кыргызстан үчүн артыкчылыктуу багыт экендигине токтолду. Бул туурасында мамлекет башчынын маалымат кызматы кабарлады.
Сөзүнүн башында ал Россия лидери Владимир Путинге саммитти алты тараптуу форматта өткөрүү демилгеси үчүн ыраазычылык билдирген.
Андан соң өз ара мамилелердин маани-маңызына токтолгон.
"Борбордук Азия өлкөлөрү жана Россия менен мамлекеттер аралык мамилелерди өнүктүрүү Кыргызстан үчүн биздин өлкөлөрдүн жана элдерибиздин жалпы тарыхый мурасына, маданиятына, экономикасына, тилдик жана руханий салттарына жана баалуулуктарына негизделген артыкчылыктуу багыт болуп саналат", — деди президент.
Ал Кыргызстан аймакташ жана кошуна мамлекеттер менен алканы бекемдөөгө кызыкдар экенине токтолгон.
"Кыргызстан соода-экономикалык, инвестициялык, транспорттук-логистикалык, энергетика, айыл чарба, миграция, маданий-гуманитардык тармактарда кызматташуунун негизги багыттарын комплекстүү өнүктүрүү боюнча биргелешкен күч-аракетте Борбордук Азия — Россия форматындагы кызматташтыкты ырааттуу өнүктүрүүгө кызыкдар", — деген Жапаров.
Президент саясий диалогду колдоп, актуалдуу маселелерди чечүүнүн эки тарапка алгылыктуу жолдорун таап, эл аралык жана регионалдык уюмдарда кызыкчылыктарды биргелешип илгерилетүү зарылдыгын белгилеген.
Жапаров Астанда эл аралык жана регионалдык деңгээлде актуалдуу бойдон калып жаткан афган маселесине да токтолуп, Афганистан социалдык-экономикалык жана гуманитардык терең кризиске кабылганын айтты.
"Бүгүнкү күндө дүйнөлүк коомчулуктун алдында өткөн ачуу тажрыйбанын кайталануусуна жол бербөө жана ал өлкөдөгү көп жылдык кандуу согуштук кагылыштарды токтотуу милдети турат. Кыргызстан Афганистанга салттуу достук мамиледеги өлкө катары ички иштерге кийлигишпөө принцибин карманып, стабилдүү жана гүлдөгөн Афганистанды көрүүгө кызыкдар. Биз бул өлкөдө тынчтык орнотуу үчүн ар дайым аракет кылып келгенбиз жана аны уланта беребиз", — деген ал.
Азыркы тапта эл аралык коомчулук үчүн Афганстандын экономикасын жандандыруу жана чыңдоо, анын регион аралык экономикалык процесстерге катышуусуна көмөктөшүү маанилүү экендигин айткан.
"CASA-1000 (CASA-1000), ТАПИ сыяктуу социалдык маанилүү инфраструктуралык жана аймактык энергетикалык долбоорлорду ишке ашырууга көмөктөшүү, ошондой эле регионалдык транспорт коридорлорун андан ары өнүктүрүү маанилүү", — деп белгилеген Жапаров.
Мындан тышкары, мамлекет башчысы БУУнун башкы катчысынын Афганистан боюнча атайын өкүлү жана Бириккен Улуттар Уюмунун Афганистанга көмөк көрсөтүү миссиясынын (МООНСА) башчысы болуп дайындалган Роза Отунбаеваны колдоого чакырды. Президент Садыр Жапаров анын БУУнун жогорку кызматына дайындалышы Афганистанда тынчтыкты жана стабилдүүлүктү калыбына келтирүү процессине пайдалуу таасирин тийгизет деген ишенимин билдирген.