Июль айында министрлер кабинети токтом кабыл алып, анда калктын аялуу катмарын медициналык кызматтар менен толук камтуу үчүн мамлекеттик кепилдиктер программасын реформалоо зарылдыгын белгиленген. Ал үчүн жергиликтүү жана чет элдик адистерден турган жумушчу топ түзүлүп, инновациялык сунуштар айтылып, маселе талкууланды. Бул тууралуу Жыпара Азизбекова Sputnik Кыргызстан радиосунун эфиринде маек куруп жатып билдирди.
Анын айтымында, Кыргызстанда 1996-жылы Ден соолук фонду түзүлүп, 1997-жылдын 1-январында Милдеттүү медициналык камсыздандыруу, ал эми 2001-жылы Мамлекеттик кепилдиктер программасы ишке киргизилген. Ошону менен бирге амбулатордук деңгээлде жеңилдетилген дары-дармек менен камсыздоонун кошумча программасы иштелип чыккан.
"Кыргызстандын жарандарына полис 12 айга берилет, анын баасы 1 504 сом. Чет өлкөлүктөр полисти алты же 12 айга сатып ала алышат. Алар үчүн жылдык чыгым 18 миң 105 сомду түзөт. Чыгым жыл сайын каралып, биздин жарандар үчүн үстүбүздөгү жылдагы жашоо минимумунун эки пайызы жана чет элдиктердин орточо эмгек акысынын формуласы боюнча эсептелет. Министрлер кабинетинин коллегиясынын биринде калкка медициналык кызмат көрсөтүүнүн жеткиликтүүлүгүн, сапатын карап, анда калктын социалдык жактан аялуу катмарын медициналык кызмат менен камсыздоо маселеси көтөрүлдү. Акыркы жылдарда баалардын жогорулашынан улам алардын кирешеси азайып, кыйынчылыкка дуушар болууда. Саламаттык сактоо министрлигине жана Милдеттүү медициналык камсыздандыруу фондуна калктын аялуу катмарын медициналык кызматтар менен камтууга Мамлекеттик кепилдиктер программасын кайра карап чыгуу тапшырмасы берилди. Бүгүнкү күндө өлкөдө амбулатордук деңгээлдеги медициналык кызматтардын базалык пакети (дарыгердин текшерүүсү, дарылануунун рецепти жана 11 негизги анализ) бар. Бул бардык кыргызстандыктар үчүн бирдей, алар камсыздандырылганбы же жокпу, баары ала алышат. Статистика боюнча, ҮМБга негизинен балдар, өнөкөт оорусу барлар, майыптар, кош бойлуу аялдар кайрылышат. 2023-жылдын июлуна чейин биз калктын категорияларын эске алуу менен негизги кызматтардын ар кандай пакеттерин кайра карап чыгууну жана калыптандырууну пландаштырып жатабыз. Мисалы, кош бойлуу аялдар, балдар жана социалдык аялуу топтор мамлекет тарабынан камсыздалып, медкызматтар бекер көрсөтүлөт", — деди Азизбекова.
Ал ошондой эле ЕАЭБге мүчө-мамлекеттердин жарандарына, чет өлкөлүктөргө амбулатордук жана стационардык деңгээлде көрсөтүлүүчү кызматтарды кайра карап чыгуу пландаштырылып жатканын кошумчалады.