БИШКЕК, 12-окт. — Sputnik. Парламентте Маданият, маалымат, спорт жана жаштар саясаты министрлигинен спорт тармагын бөлүп чыгуу сунушталды.
Вице-спикер Нурбек Сыдыгалиев Дене тарбия жана спорт агенттиги кылып өзүнчө орган катары түзүү боюнча президентке сунуштоо үчүн токтом долбоорун иштеп чыккан. Ал мурдагы агенттик департамент болуп министрликтин курамына киргенден кийин көйгөйлөр көбөйгөнүн айтууда.
"Маданият менен спортту бириктирүү мүмкүн эмес. Экөөнүн милдети, максаттары жана саясаты такыр башка. Министрликтин курамына киргенден бери өз убагында чечимдерди кабыл алуу, каржылоо, иш кагаздарын жүргүзүү маселелеринде жана кадр саясатында көйгөй жаралууда. Департаменттин директору менен министр тарабынан дайындалган кызматкерлер ортосунда пикир келишпестиктер болууда. Башка мамлекеттердин министрлери менен сүйлөшүүда дагы сөзү кыска болуп жатат", — деди Сыдыгалиев.
Аталган демилгени көпчүлүк депутаттар колдоду, кээ бирлери агенттик эле эмес, министрлик кылып түзүү керектигин билдиришти.
"Буга чейин Спорт жана дене тарбия агенттигин түзүү боюнча 56 депутат кол коюп, президентке кайрылуу жасаганбыз. Кабинетине кирип дагы сүйлөшкөнбүз, "кичине убакыт керек, чечип берем" деген. Ошондон бери беш-алты ай өттү", — деди Сыдыгалиев.
Натыйжада депутаттар токтом долбоорун дагы толуктап иштеп чыгып, президентке жөнөтө турган болушту.