БИШКЕК, 11-окт. — Sputnik. Кайгуул милициясы борбор калаада бүгүн түнү жана эртең менен Жукеев-Пудовкин көчөсүнө автоунааларды токтотпой турууну өтүндү.
Бул кадам 11-12-октябрда Азербайжандын Кыргызстанга келген делегацияларынын ары-бери жүрүү коопсуздугун камсыздоо максатында жасалып жаткандыгын айтышты.
"Кайгуул кызматы бүгүн түнү жана эртең менен Жукеев-Пудовкин (эки тарабына тең) көчөсүнүн Токомбаев көчөсүнөн тартып, Ахунбаев көчөсүнө чейинки бөлүгүнө автоунааларды токтотпой турууну өтүнөт. Түнкүсүн Жукеев-Пудовкин көчөсүнүн жээгине калтырып кеткен автоунааларды эвакуатор жүктөп алып кетерин алдын ала эскертет", — деп жазылган маалыматта.
Кайгуул милициясы шаардын негизги көчөлөрүндө автокөлүктөрүн токтотуп койгон айдоочулардан алдыңкы терезесине уюлдук телефондун номерин калтырып коюу зарылдыгын айтышты.
Эске салсак, бул күндөрү Кыргызстанда Азербайжан президенти Илхам Алиев мамлекеттик сапар менен жүрөт.