Россия-Кыргызстан өнүктүрүү фонду тарабынан бөлүнгөн каражаттын эсебинен Баткен облусунда үч объектинин курулуш иштери башталды. Келишимдерге кол коюу аземине, курулуштардын капсуласын салууга Россия президентинин администрациясынын чет өлкөлөр менен аймактык, маданий байланыштар башкармалыгынын башчысы Игорь Маслов башында турган делегация катышты.
Кадамжай районунун Халмион айылында кыйраган үйлөрдү, объектилерди кайра куруу үчүн жеңил, бирок бышык автоклавдуу газобетондорду чыгара турган заводдун курулушу башталды.
РКӨФ бул үчүн 14 миллион доллар бөлгөн. Фонддун башкармалыгынын төрагасы Артём Новиков завод аймактагы эң ири долбоор экенин белгиледи.
Завод ишке кирсе жылына 160 чарчы метр газоблок чыгаруу пландалууда, өндүрүштүн бир бөлүгү экспорттолот. Заводдун ээлери кирешенин беш пайызын облустун социалдык өнүгүшүнө которууга милдеттендирилди. Ишкана жергиликтүү 60 тургунду иш менен камсыздайт.
Кызыл-Кыя шаарында да эки объектинин курулушу башталды. Алардын бири - жеке менчик медициналык борбор, анын имаратын куруп, жабдуулар менен камсыздоо үчүн РКӨФ тарабынан 460 миң доллар каражат бөлүнгөн. Медициналык борбор курулса күнүнө 100гө чейин бейтаптарды кабыл алат, мындан тышкары, 30 орунга ылайыкталган стационардык бөлүмү болот.
Дагы бир долбоор — ошол эле шаардагы үч кабаттуу менчик мектептин жаңы корпусунун курулушу.
Мындан тышкары, россиялык делегациянын катышуусунда Кадамжай районунда "Баткен облусунун экономикалык өнүгүшү" темасында тегерек стол өттү. Ал эми 8-октябрда Ош шаарында кыргыз-орус инвестициялык форуму болот.
Тема боюнча: