БИШКЕК, 7-окт. — Sputnik. Чүйдүн Молдовановка айылындагы №31 түзөтүү мекемесинин аймагында Жаза аткаруу кызматынын борбордук ооруканасы курулууда. Бул тууралуу ЖАКтын маалымат кызматы кабарлады.
Медициналык борбордун жетекчиси Азиз Аалиевдин айтымында, медициналык жаңы жай 275 орунга ылайыкталган. Заманбап жабдуулар менен жабдыла турган ооруканада бир нече — хирургиялык, операциялык, терапиялык, ошондой эле нейропсихиатриялык жана наркологиялык бөлүмдөр бар.
Мындан сырткары, ооруканада дагы үч имарат курулат: борборлоштурулган стерилизация бөлүмү, кубаттуу откана жана коомдук тамактануу бөлүмү. Акыркы объект ишке дээрлик даяр экени айтылды.