БИШКЕК, 6-окт. — Sputnik. Бир мандаттуу округдан шайланган 14 депутаттын "Ата-Журт Кыргызстан" фракциясынан бөлүнүп чыгышын УКМК төрагасы Камчыбек Ташиев колдоду. Бул туурасында жаңы түзүлгөн "Мекенчил" депутаттык тобунун лидери Элмурза Сатыбалдиев билдирди.
Эл өкүлү Ташиев "Ата-Журт Кыргызстан" партиясынын түптөөчүсү экенин ырастап, бүгүн эртең менен ал фракциянын жыйынына катышканын айтты.
"Ич ара талаш-тартыш болгон жок. Фракцияда 33 депутат көп болуп кетет экен деп, бөлүнүп иштеп көрөлү дедик. Жыйында биз ушуну сунуштадык, ал (Камчыбек Ташиев — ред.) туура тапты. Камчыбек Кыдыршаевич өзү түптөгөн партиясынын — фракциясынын жыйынына келип катышты. Биздин сунушка каршы чыккан жок, тескерисинче, колдоп койду", — деди Сатыбалдиев.
Мындан улам журналисттер "Ташиевдин "Ата-Журт Кыргызстан" партиясына тиешеси барбы?" деп тактап сурашты.
Анда депутат 2007-жылы эле Ташиев "Ата-Журт" партиясын негиздегенин, соңку шайлоодо күчтөп "Ата-Журт Кыргызстан" деп алып чыкканын айтты. Ал эми жаңы түзүлгөн "Мекенчил" депутаттык тобунун президент Садыр Жапаровдун "Мекенчил" партиясына тиешеси жоктугун белгиледи.
"Биз "Патриот" деп атайлы дегенбиз. Анан бир-эки депутат ал орусча сөз, кыргызчага которуп "Мекенчил" деп аташ керектигин талап кылды. Ал партия, биз депутаттык топ түздүк", — деди Сатыбалдиев.
Белгилей кетсек, бүгүн бир мандаттуу округдан шайланган 14 депутат "Ата-Журт Кыргызстан" фракциясынан кайра чыкканын жарыялаган.