БИШКЕК, 5-окт. — Sputnik. Жогорку Кеңештин депутаты Шарапаткан Мажитова төрагалыкка талапкер Нурлан Шакиевди кызматтан кеткен Талант Мамытовдун ордунда болсо эмне кылмактыгын сурады.
"Жакында болгон окуяга окшош кырдаалга туш болуп калсаңыз кандай чыгат элеңиз? Аткаруу бийлиги бул жерге келип кичине бир нерсе болду..." — деп кыйытты депутат.
Шакиев мындай кырдаалда сөзсүз түрдө акыл-эс менен сабырдуу болуп чечим кабыл алуу керектигин айтты.
"Сабырдуу болсоң озорсуң, сабырсыз болсоң осолсуң", "Жоону жеңген баатыр эмес, ачуусун жеңген баатыр" деп айтылып келет. Кудай буюрса, сиздер менен биргеликте сабырдуулук менен өлкөбүз, элибиз үчүн татыктуу чечимдерди кабыл алганга аракет кылабыз", — деди төрагалыкка талапкер.
Мажитова кайра тактап, "Баткенге барганга жеткирбейт белеңиз? Кечээги Кыдыршаевичтин (УКМК төрагасы Камчыбек Ташиев — ред.) кырдаалында..." деп сурады.
Анда да Шакиев бардыгын сабырдуулук, өз ара сый мамиледе чече турганын айтты.
Белгилей кетсек, тажик тарап кол салгандан кийин парламент маселени жабык эшик артында талкуулаган. Төрага баштаган кээ бир депутаттар жыйындан чыгып эле түз Баткенге кетишкен. Кийинчерээк Адахан Мадумаров ал күнү УКМК төрагасы Камчыбек Ташиев ЖКга эки ящик автомат көтөрүп киргенин айткан.