БИШКЕК, 29-сен. — Sputnik. БУУнун Коопсуздук кеңеши "Түндүк агым" жана "Түндүк агым — 2" газ түтүктөрүндөгү кырсыкка байланыштуу жума күнү ыкчам жыйын өткөрөт. Бул тууралуу Россиянын аталган уюмдагы өкүлүнүн орун басары Дмитрий Полянский өзүнүн Telegram-каналы аркылуу билдирген.
Анын айтымында, Коопсуздук кеңешинин графигине алдын ала жолугушуулар жазылып калгандыктан, "Түндүк агым" боюнча Россия тарап сунуштаган жыйын Нью-Йорк убактысы боюнча саат 15:00гө (Москва убактысы боюнча саат 22:00гө) белгиленген.
Эске салсак, Европанын Россияга каршы санкциялары жана Siemens турбиналары оңдоп-түзөөдөн өтүп жаткандыктан, "Түндүк агымда" иш августтун аягында токтотулган. Бирок түтүк газ толтурулган боюнча калган. Дания менен Швеция бийликтеринин маалыматтарына караганда, "Түндүк агым" түтүгүнүн эки жеринен, "Түндүк агым — 2" түтүгүнүн бир жеринен газ чыкканы аныкталган.
Ал арада Швециянын жээк күзөтү "Түндүк агым" газ түтүгүнүн төртүнчү жеринен газ чыкканын аныктаганы айтылды. Белгилүү болгондой, анын экөө Швециянын, экөө Даниянын экономикалык зонасында жайгашкан.
Bloomberg Германия менен Дания газ диверсиядан улам чыкканын билдиргенин жазып чыкты. Германиянын коопсуздук кызматынын аты атагысы келбеген өкүлү агенттикке газ күч менен чыгарылганын далилдер көрсөтүп жатканын айтып, бул техникалык катачылык эмес деген пикирин билдирген. Ал арада Польшанын мурдагы тышкы иштер министри Радослав Сикорский газ түтүгү жабыркаганына кубанып, соцтармактагы баракчасына "рахмат, АКШ" деп жазып жиберген. Бирок эмне тууралуу айтып жатканын түшүндүргөн эмес. Россиянын ТИМ өкүлү Мария Захарова бул пост теракт боюнча расмий маалымат болуп саналабы деп суроо салган.
Ал арада АКШнын өкүлү Карин Жан-Пьер президент Жо Байден "Түндүк агым —2" газ түтүгүн жок кылууну эмес, түтүктү кайра иштетүүгө жол бербөөнү убадалаганын айтты.
Россия газ түтүгүнө жасалган сокку боюнча кырдаалды адилеттүү жана ар тараптан тыкыр изилдеп чыгууну талап кылууда. Буга чейин Башкы прокуратура "Түндүк агым" газ түтүктөрүнө зыян келтирүү фактысы боюнча эл аралык террорчулук актысына ылайык иш козгоону демилгелеген.
"Түндүк агым" — Балтика деңизинин түбүнөн өткөн Россия менен Германиянын ортосундагы негизги газ куурунун бир бөлүгү.