БИШКЕК, 29-сен. — Sputnik. Бишкек шаарындагы мурдагы башкы прокурор Элмурза Сатыбалдиевге тиешелүү Шүкүров көчөсү, 166 дарегиндеги үйдүн көчөгө, муниципалдык аймакка чыгып кеткен короосунун дубалы түрттүрүлдү.
Видеону мэриянын маалымат кызматы түз эфир менен берди.
Буга чейин мэрия муниципалдык жерге курулган жер үйлөрдүн короолору тротуар салуу үчүн түрттүрүлөрүн эскерткен.
Эске салсак, ЖК комитеттеринин биринин жыйынында Бишкектин вице-мэри Нурдан Орунтаев менен Элмурза Сатыбалдиев айтыша кетип, депутат кыр көрсөтүп опурулган видео тараган. Сатыбалдиев короонун дубалы муниципалдык жерге чыгып кетсе да нааразылыгын билдирген.
"Мен сага айтып коеюн, иним, сен мага күпүлдөбө, башка жерде күпүлдө. Бул Жогорку Кеңеш, өзүңдү сыйлабасаң, бизди сыйла. Сыйлагың келбесе, сыйлатып алам. Булар сыйлатпаса, мен сени сыйлатам, сөзсүз", — деген анда Сатыбалдиев.
Депутат вице-мэрге опурулуп жатканда Орунтаев анын үйүнүн короосунун бөлүгү маселе чыгып жаткан жерде турганын айткан. Андан кийин парламентарий үйү Шүкүров көчөсү, 166 дарегинде турганын билдирген.
Сатыбалдиевдин бул сөзү коомчулуктун бир катарынын нааразылыгын жаратып, депутаттан мыйзамды сыйлашын талап кылган.
2GIS тиркемеси менен менен караганда объектинин балдар бакчасы катары пайдаланылып, иштетилип жаткандыгын көрүүгө болот.
Мэрия мурдараак отчет берип, Шүкүров көчөсүндө мындай 71 короо бар экендигин билдирген. Алардын ичинен 36 кожоюн өз ыктыяры менен алса, 22синин короосунун муниципалдык жерге чыгып кеткен бөлүгү мажбурлоо менен түрттүрүлгөнү айтылган.
Мэрия Октябрь райондук сотуна 21 доо арыз бергени жана дагы 11ди даярдап жатканы маалым болду.