БИШКЕК, 29-сен. — Sputnik. Жогорку Кеңештин депутаты Элмурза Сатыбалдиев үйүнүн короосунун түрттүрүлүшү боюнча комментарий берди.
Эл өкүлү ал турак жай өзүнө эмес, бир тууганына таандык экенин айтып, короосун түрттүрүүгө каршы чыкпаганын белгиледи.
"Мен үйдүн эң улуусу болгондуктан бир туугандарымдын үйлөрүн дагы меники деп айтам. Ал эми короонун дубалдары биз үйдү сатып алганга чейин эле тургузулган экен. Мен жыйында түрттүрүүгө каршы болгон жокмун. Сөздүн маанисин түшүнбөй, видеону кесип сенсация кылып жатышат. Мен үйлөр тарапты жашыл зона кылып, жолдун четине тротуар кылсаңар тургундар көрктөндүрүп карайт дегем. Эгер үйлөр тарапка тротуар жасап, ортосун жашылдандырса каралбай таштанды таштоочу жер болуп калат. Бул менин эле эмес, ал көчөдө жашаган 70 үй-бүлөнүн талабы", — деди Сатыбалдиев.
Ал эми Бишкектин вице-мэри Нурдан Орунтаевди каяша сүйлөп, орунсуз күлүп отурганы үчүн зекигенин айтты.
"Ар дайым келечек жаштардыкы деп айтам. Бирок зөөкүр жаштарды тилдеп, урушуп, керек болсо сабаш керек. Себеби отуруп алып зөөкүрлүк кылып, күлүп, мылжыйганга уруксат берилген эмес. Мен ошолорго сүр көрсөтүп койдум", — деди депутат.
Эске салсак, ЖК комитеттеринин биринин жыйынында Бишкектин вице-мэри Нурдан Орунтаев менен Элмурза Сатыбалдиев айтыша кетип, депутат кыр көрсөтүп опурулган видео тараган. Сатыбалдиев короонун дубалы муниципалдык жерге чыгып кетсе да нааразылыгын билдирген. Ал эми бүгүн мэрия барып короосун түрттүрүп салды.