Алгачкы аскердик даярдоодон бардыгы өтүшү керек. Аны Баткен менен гана байланыштырган туура эмес. Бул тууралуу Токтогул Какчекеев Sputnik Кыргызстан радиосуна маек куруп жатып билдирди.
Анын айтымында, жаш муунга атуулдук сезимди сиңирүү маанилүү.
"Өлкөдө аскерге чейинки даярдыкка суз мамиле жасалып келет. Баткендеги акыркы кагылышуудан кийин бул маселе кызуу талкууланууда. Албетте, аскерге чейинки даярдык керек, аны Баткендеги кырдаалга байлоо туура эмес. Бул мамлекеттин кызыкчылыгы боюнча программада болушу шарт. Аскерге чейинки даярдык эмес, алгачкы аскердик даярдыктан бардыгы өтүшү зарыл. Союз учурунда мындай мамлекеттик программанын алкагында 8-9-10-класстын окуучулары аскердик даярдоодон өткөн. Ошону кайтарып келүү керек. Ал үчүн ардагерлердин тажрыйбасын, потенциалын колдонуу зарыл. Анткени алар аскердик кошуундарды башкарып, курал-жаракты пайдаланууну окутууга даяр адамдар. Учурунда жаш муунга курал-жаракты колдонгонду, ал тургай суучулдукту да үйрөткөн армияга, аскер-аба жана аскер-деңиз флотуна жардам көрсөтүүнүн ыктыярдуу коому (ДОСААФ) болгон. Азыр ал коммерциялык уюм болуп, анда окутуу кымбат. Эгерде алгачкы аскердик даярдоону киргизүүнү кааласак, тийиштүү мекемелер жана ардагерлер буга чейинки болгон коогалаңдарды карап, программа түзүп окутуу зарыл", — деди Какчекеев.
Ошондой эле ал программа Кыргызстандын географиясын эске алуу менен иштелип чыгышы керектигин кошумчалады.