БИШКЕК, 27-сен. — Sputnik. Президенттин Ысык-Көл облусундагы ыйгарым укуктуу өкүлү Алтынбек Сулайманов өз каалоосу менен кызматын тапшырды. Бул туурасында облус жетекчилигинин маалымат кызматы билдирди.
Сулайманов жумушун тапшырып жатып кайрылуу жасаган. Ал азыркыдай жергиликтүү башкаруу системасы иштеп турганда аракети текке кетерине көзү жеткенин жазды.
"Мен дайыма өлкөбүздүн аймактык башкаруусун түп-тамырынан реформалоону сунуштачумун. Ар дайым жергиликтүү бийликтин ишин сындап, губернаторлор, акимдер, айыл өкмөттөр толук кандуу иш жүргүзө албай жатканын да айтып келгем. Тагдыр буюруп өзүм облус башчысы болуп калдым. Жергиликтүү бийликтин ишин жон терим менен сезип, ичинен көрдүм. Жергиликтүү бийликте бүгүнкүдөй башкаруу болуп турганда элетте эч кандай өнүгүү болбосуна көзүм жетти. Олуттуу реформага муктаж. Борбордук башкарууну децентрализациялоо керек. Мен саясатчы, сөзүнө бек турган инсан катары ар бир баштаган ишимди аягына чыгарууга аракеттенип келем. Ошондуктан мен Ысык-Көл элинин да, өзүмдүн да убактымды кетирбей өз каалоом менен кызматымды тапшырууну чечтим", — деп жазды Сулайманов.
Алтынбек Сулайманов президенттин Ысык-Көл облусундагы ыйгарым укуктуу өкүлү болуп ушул жылдын 24-февралында дайындалган. Ага чейин Жогорку Кеңеште "Альянс" фракциясынан депутат болуп отурган.