Кайсы багыттагы кооперативдер болбосун, баары 2004-жылы кабыл алынган бир мыйзамдын негизинде иш алып барып келишкен. Биз, мезгилдин жана коомчулуктун талабына ылайык, ал мыйзамга турак жай кооперативдери боюнча өзгөртүү, толуктоолорду сунуштап жатабыз. Бул тууралуу Орозбек Сыдыков Sputnik Кыргызстан радиосуна маек куруп жатып билдирди.
Анын айтымында, аталган мыйзам коомдук талкууга коюлганда келип түшкөн сунуш, пикирлер учурда талданууда.
"Соңку учурларда турак жай кооперативдери боюнча өлкө аймагында чуулгандуу окуялар болуп өттү. Мындан улам коомчулук аталган уюмдарды мамлекеттик бир орган көзөмөлдөсө деген сунуштарды беришти. Бирок бизде кооперативдер боюнча мыйзам бар. Ал 2004-жылы кабыл алынган жана башка тармактардагы кооперативдер эч кандай көйгөйү жок эле ушул мыйзамдын алкагында ишмердүүлүгүн жүргүзүп келишет. Өзгөчө айыл чарба тармагында мындай мисалдар көп. Бирок турак жай маселесине келгенде бир топ көйгөйлөр жаралды. Себеби эл өз укук, милдеттерин тактап, билген адистер менен кеңешип иш алып барбаганында болду. Экинчиден, ошол кооперативди түзгөн айрым жетекчилер да ал уюмдун негизги иш функцияларын жакшы билбегенине күбө болдук. Андыктан мыйзамга толуктоолорду сунуштап жатабыз. Ага ылайык, турак жай кооперативдеринин жоопкерчилиги күчөтүлөт. Төлөнгөн каражат максаттуу гана колдонулушу шарт, башкача айтканда, административдик же башка чыгымдарга колдонууга тыюу салынат. Кооперативдин веб-сайты болушу зарыл, мүчөлөрү онлайн, офлайн байланышып, анан белгиленген гана эсепке акча которушу керек. Азыркы учурда, тилекке каршы, өздөрү башка мамлекетте жүрүп бирөө аркылуу акча которуп, же берип жиберип, же башка эсептерге салып, кийин каражаттын дайынын таппай калгандар болууда. Ошондой эле мүчөлөрдүн тизмеси ачык көрсөтүлүүсүн мыйзам талап кылат", — деди Сыдыков.
Ал аракеттеги мыйзамда мүчөлүктөн чыгыш үчүн 12 ай мурда арыз жазып, финансылык жыл бүткөндөн кийин үч айдан соң акчасы кайтарылса, учурда алты ай мурда арыз жазып жана ал арызы бир ай ичинде каралуусу сунушталып жатканын кошумчалады.