БИШКЕК, 21-сен. — Sputnik. Блогер Нурлан Мотуевди сабоого шектелген киши кармалганын ИИМ билдирди.
Мотуев милицияга кайрылып, 18-сентябрь күнү жума намаздын алдында үч белгисиз адам аны ур-токмокко алганын кабарлаган. Жабырлануучунун айтымында, сабагандар 32 миң сом акча, Samsung үлгүсүндөгү телефон, паспорт жана пенсиялык күбөлүк салынган барсеткасын алып кетишкен. Аталган факты боюнча Кылмыш-жаза кодексинин 207-беренесинин ("Каракчылык") негизинде кылмыш иши козголгон.
© Фото / пресс-служба МВД
Шектүү кармалды. ИИМ анын буга чейин каракчылык кылып, автоунаа уурдаганы үчүн соттолуп чыкканын кабарлады. Колго түшкөн киши Мотуев менен жазасын өтөп жаткан №32 колонияда таанышкан.
Шектүү адам Мотуев менен талаш маселеси бар экенин, андан өч алууну көксөп жүргөнүн айткан. Ал мечитке эки таанышы менен келген, алар азыр издөөдө. Кармалган киши айдап жүргөн автоунаанын уурдалганы аныкталып, айып короого токтотулду.