Евразия экономикалык биримдигинде мүчө мамлекеттер ортосунда үрөндөрдүн бирдиктүү сапаты боюнча жобо иштейт. Бул тууралуу Дамир Байдалиев Sputnik Кыргызстан радиосуна маек куруп жатып билдирди.
Анын айтымында, жобого ылайык уюмга мүчө мамлекеттер үрөндөрдү талаа инспекциясынан өткөрүү жана сертификациялоодо бирдиктүү талаптарды аткарышат.
"ЕАЭБдин алкагында үрөндөрдүн сапатын арттыруу максатында иштелип чыккан жобо бар. Ага ылайык, мүчө мамлекеттер бири-биринин үрөндөрүнүн сапатын таанышы керек. Ошондой эле бирдиктүү талаптар да коюлган. Ошол эле талаа инспекциясынан өткөрүү, сертификациялоо процедуралары баарыбыздыкы окшош. Кыргызстан бул багыттагы быйылкы отчётторун уюмга жөнөттү. Тактап айтканда, жобо кынтыксыз иштеп жатат. Албетте, анын пайдасы көп экен. Мисалы, пандемия учурунда же былтыр бизде кургакчылык болуп үрөн тартыштыгы жаралганда ЕАЭБге мүчө Россия менен Казакстан үрөн беришти. Башкача айтканда, бир жерде кризис жаралса башка мүчө өлкөлөр карап тура беришпейт экен. Иш жүзүндө мындай аракеттер көрүлүп жатат", — деди Байдалиев.
Ал аталган жобо үрөндүн бардык түрлөрүнө жайыларын кошумчалады.