БИШКЕК, 20-сен. — Sputnik. 20-сентябрдан тарта кыргыз-тажик мамлекеттик чек арасынын Ош облусунун Чоң-Алай районундагы жана Баткен облусундагы тилкесинде жарылбай калган мина, ок-дарыларды аныктоо жана зыянсыздандыруу иштери жүргүзүлөт. Бул тууралуу Чек ара кызматынан кабарлашты.
Мындан улам аталган аймактар курчоого алынып, кайтарыла турганы кошумчаланды.
"Бул иш-чаралар Кыргызстан менен Тажикстандын тийиштүү мамлекеттик структуралары менен макулдашылган", — деп айтылат маалыматта.
Мекеме чек арага жакын жайгашкан шаар, аймактардын элин сабырдуулукка чакырып, чагымчылыкка алдырбай ар бир маалыматты жергиликтүү бийлик, органдардан тактап алууну өтүндү.
Тажикстандын Кыргызстанга баскынчылыгы
Тажик тараптын кол салуусунан 59 кыргызстандык набыт болду, арасында жай тургундар, жаш балдар бар. 169 киши ар кандай жаракат алган, оор абалдагылар Ош жана Бишкектеги ооруканаларга жеткирилип жатат.
14-сентябрь күнү тажик аскерлери Баткенде чек арага жакын аймактарга ок чыгарып, сүйлөшүүдөн кийин токтогон болчу. Бирок 16-сентябрдын таңында Баткен облусунун бардык чек ара тилкесин аткылап кирген. Кагылышууга тажик аскерлери эле эмес, жалданма топтор дагы аралашкан.
Кыргызстандын Чек ара кызматы күч түзүмдөрү тажик тарап КР аймагын басып алуу максатында оор техникаларды, авиация, "Град" ракеталык системасын колдонуп жатканын кабарлады.
Эки өлкөнүн УКМК төрагалары Камчыбек Ташиев менен Саймумин Ятимов атышууну токтотууга макулдашышкан. Бирок ага карабай тажик тарап кайра ок чыгарган. Миномёттун снаряддары Баткен шаарынын чок ортосуна дагы түшүп жатты.
17-сентябрда Оштун Чоң-Алай районундагы заставаларды аткылай баштады.
Тажикстандын аскерлери, жөнөкөй жарандары жана белгисиз топтор Баткен менен Лейлек райондорундагы ондогон үйлөрдү, социалдык объектилерди, дүкөндөрдү талап-тоноп, өрттөп кетишкен.
18-сентябрда атышуу токтоду, бирок абал чыңалган бойдон турат.
Кыргызстан расмий түрдө окуяны "Тажикстандын алдын ала даярдалган агрессиялык куралдуу кол салуусу" деп атады.
КР Коопсуздук кеңешинин катчысы Марат Иманкуловдун берген маалыматы боюнча, Кыргызстанга кол салган Тажикстандын Куралдуу күчтөрүнөн 200дөн ашык адам өлүп, 400гө чукулу жарадар болгон.