БИШКЕК, 19-сен. — Sputnik. Тажикстандын кол салуусунан набыт болгон беш кишинин аты-жөнү тактала элек. Бул тууралуу саламаттык сактоо министринин орун басары Жаркынбек Касымбеков ЖКнын тармактык комитетинин жыйынында билдирди.
"Тилекке каршы, учурда ким экени аныктала элек беш киши бар. Баткендеги өлүкканаларга адамдардын сөөгү дагы деле келип жатат", — деди Касымбеков.
Соңку расмий маалымат боюнча, Тажикстандын Кыргызстанга агрессиялык кол салуусунан 59 адам набыт болду. 169 киши ар кандай жаракат алган, оор абалдагылар Ош жана Бишкектеги ооруканаларга жеткирилип жатат.