БИШКЕК, 18-сен. — Бүгүн таң эрте Баткен облусуна Нарындан гуманитардык жардам жүктөгөн эки фура жөнөп кетти. Бул туурасында аймактык кабарчы билдирди.
Кечээтен бери Нарын облусунун бардык райондорунун жана шаар элинен 30 тоннадан ашык картошка, 1,5 тоннадай азык-түлүктүн түрлөрү жана 63 кой чогултулган.
Облустагы мекеме-ишканаларда иштеген кызматкерлер бир күндүк эмгек маянасын, тагыраагы, 10 миллион сомго жакын каражатты жаңырган жуманын ичинде которуп беришмекчи.
Кыргыз-тажик чек арасында жабыр тарткандарга бул күндөрү Кыргызстандын ар кыл аймактарынан гуманитардык жардамдар жөнөтүлүүдө.