НАРЫН, 18-сен. — Sputnik. Кыргыз-тажик чек арасындагы жаңжалда баатырларча курман болгон Апсамат Жекшенбеков туулуп-өскөн Нарын облусунун Ат-Башы районундагы Терек-Суу айылында акыркы сапарга узатылды. Бул туурасында аймактык кабарчы билдирди.
Аны жерге берүү зыйнаты бүгүн, 18-сентябрда, өтүп, ага жергиликтүү облустук жана райондук бийлик өкүлдөрү, жакын туугандары, айылдаштары катышты.
Апсамат Жекшенбеков 1998-жылы 2-майда жарык дүйнөгө келген. Туулуп-өскөн Терек-Суу айылындагы Анварбек Чортеков атындагы орто мектепти 2016-жылы бүтүрүп, ошол эле жылы Бишкек шаарындагы Советтер Союзунун Баатыры Калыйнур Үсөнбеков атындагы аскердик окуу жайына өткөн. Окуусун ийгиликтүү аяктагандан кийин лейтенант наамы менен Баткенде кыргыз-тажик чек арасында кызмат өтөөгө жөнөтүлгөн. Баткенде кызмат өтөп жүргөн учурда улук лейтенант наамы берилип, взводдун командири болуп кызмат өтөп жаткан.