БИШКЕК, 17-сен. — Sputnik. РФ президенти Владимир Путин менен КЭР башчысы Си Цзиньпиндин "дүйнөлүк аренадагы бирдиктүү фронт" тууралуу билдирүүсү АКШ үчүн кооптуу белги деп жазды The Washington Times.
"Си менен Путин эл аралык демократия менен суверенитетке коркунуч жараткан жаңы дүйнө тартибин түзүүнү көздөп жатышат", — деп жазды басылма америкалык сенатор Маршу Блэкберндин айтканына таянып.
Макаланын автору Аскер-деңиз күчтөрүнүн отставкадагы капитаны жана АКШнын Тынч океаны флотунун чалгын кызматынын директору Жим Фанеллдин пикирин келтирген. Анда эки лидердин жолугушуусу Кытай менен Россиянын стратегиялык союздаштыгын дагы бир ирет тастыктаганы белгиленген. Фанеллдин айтымында, мындай алака Батышка эч жакшылык алып келбейт.
"Жаңы альянс же конфронтация, же АКШ менен анын союздаштарына каршы эки фронттуу согуш ыктымалдыгын түшүндүрөт", — деп айтылат макалада.
Россия менен Кытай лидерлери Өзбекстанда өткөн ШКУ саммитинин алкагында жолуккан. Владимир Путин Батыштын көпчүлүк мамлекеттер кабыл ала албай турган бир уюлдуу дүйнө түзүү аракетин сынга алды. Ал эми Кытай жетекчиси РФ менен КЭР жоопкерчиликтүү дүйнөлүк державанын бийик үлгүсүн көрсөтүп, ааламды туруктуу өнүгүүнүн жолуна алып чыгууга даяр экенин айтты.
ШКУ саммитинин жыйынтыгы менен 40тан ашуун документ кабыл алынды.