БИШКЕК, 16-сен. — Sputnik. Түрк мамлекеттер уюмунун башкы катчысы Багдад Амреев кыргыз-тажик чек арасында оор курал-жарактар жай тургундарга каршы колдонулушун сындады. Аталган уюм Баткендеги жаңжал тууралуу билдирүү таратты.
Амреев кыргыз-тажик чек арасындагы куралдуу кагылышууга олуттуу тынчсыздануусун билдирип, тез арада атышууну токтотуп, талашты саясий-дипломатиялык жол менен чечүүгө чакырган.
"Түрк мамлекеттер уюмунун башчы катчысы жай тургундарга, жарандык инфраструктура объектилерине, анын ичинде мектептерге карата оор курал-жарак колдонулган агрессияны сындайт. Сабырдуулук менен мүмкүн болгон бардык каражаттарды ишке салып чыңалууну басаңдатууга чакырат", — деп айтылат маалыматта.
Түрк мамлекеттер уюму кырдаалга байкоо салып жатат, жаңжалды тынчтык жолу менен чечүү үчүн Кыргыз Республикасына колдоо көрсөтөт. Ошондой эле Борбор Азияда туруктуулукту жана бейпилдикти сактоо үчүн сүйлөшүүлөрдү жүргүзүүнүн маанилүүлүгүн эске салган.
Соңку маалымат боюнча, кыргыз-тажик чек арасындагы кагылышуудан 42 кыргызстандык жарадар болду. Лейлек районундагы Достук айылында 15 жаштагы кызга снаряддын сыныгы тийип көз жумду. УКМК тажик тарап танкаларды, сооттолгон техниканы, залптык октун "Град" реактивдүү тутумун пайдаланып жатканын айтууда. Алар Достук айылындагы мектепти басып алышкан. "Баткен" аэропортунун айланасын, шаардагы объектилерди да аткылаган.
Ал эми кыргыз аскерлери Тажикстандын "Ляккан" жана "Богдари" чек ара заставаларына сокку уруп, ири көлөмдөгү оор техникасын жок кылды.