Алтай музыкасын бир укканда эле кыргыздын генетикалык коду ойгонот. Бул тууралуу Роза Аманова Sputnik Кыргызстан радиосуна маек куруп жатып билдирди.
Анын айтымында, алтай элинин салттуу музыкасы казылбай жаткан чоң казына катары көп окумуштууларга кызыктуу.
"Мен окумуштуу катары Алтай жерине сапарым болбогонуна өкүнөм. Алардын чатхан, топшур деген музыкалык аспаптарынан чыккан кайрыктар кыргыздын генетикалык кодун ойготот. Анткени Манас атабыздын Алтайдан келиши, ал жактагы Манас көлү, жери буга далил болуп турат. Бекеринен улуу жазуучубуз Чыңгыз Айтматов алтай темасына кайрылбаса керек. Ал жерде 30га жакын түрк тилдүү эл бар. Демек, ага өзгөчө көңүл буруп, биздин чыгармаларга салыштырып, анализдеп көрүү керек. Кайрыктарында ритмдик окшоштуктар да болушу мүмкүн. Илимий жактан изилдеп, көп табылгаларга ээ болсок болот", — деди Аманова.
Ошондой эле адис кыргыз элинин руханий маданиятынын ажырагыс бөлүгү катары салттуу музыканы комузсуз элестетүү мүмкүн эмес экендигин, комуздун жаңы маанисин ачууга аракеттер болушу керектигин кошумчалады.