БИШКЕК, 15-сен. — Sputnik. Баткендеги кечээки кыргыз-тажик чек арасындагы чатакта аскер кийимчен эмес, сакалчан кишилердин Кыргызстандын постторуна чабуул койгону байкалды. Бул туурасында УКМК төрагасы Камчыбек Ташиев журналисттерге маалымат берип жатып билдирди.
Ал мындай көрүнүш биринчи ирет байкалгандыгын айтты.
"Дагы бир өзгөчөлүк, аскер эмес, жай жарандардын биздин постторго чабуул койгону байкалган. Бул биринчи жолу болуп жатат, аны белгилеп койдук жана аны кооптуулук деп айтышыбыз керек. Биздин Чек ара кызматы, күч түзүмдөрүбүз бардык кырдаалга даяр турат. Ал кишилер бир жакка кетип калган жок. Өңүттөрдө, бир жерде даярданып жатышы мүмкүн", — деди УКМКнын төрагасы.
Мындай маалыматты Чек ара кызматы кечээ кечинде учкай билдирген.
Ташиев бул көрүнүш көз жаздымда калбагандыгын жана мындан аркы кадам кандай болорун айтты.
"Бул боюнча керектүү маселелерди кабыл алып жатабыз. Алар тууралуу бардык жактарга, өнөктөштөргө маалымат берилди. Мамлекетибиздин чек арасына башкаларды бир метр дагы киргизбейбиз, коопсуздукту сактайбыз. Күчүбүз да, мүмкүнчүлүгүбүз да жетет. Чек арачылар өз кызматтарын даана, так аткарып жатат", — деди ал.
Эске салсак, 14-сентябрда Баткендеги кыргыз-тажик чек арасында чыр чыгып, ок атышуу алгач Булак-Башы тилкесинде болгон. Андан соң чатак оту Как-Сайда, кийин Паскы-Арык аймагында жанган. Кыргыз тараптан эки жоокер жаракат алган. Андан соң "Самаркандек" заставасынын жанындагы атышууда эки кыргызстандык – бир аял жана бир эркек ок жегени, кийинчерээк 11 жаштагы бала жарадар болгону айтылган.