БИШКЕК, 15-сен. — Sputnik. COVID-19 пандемиясы соңуна чыгып бара жатат. Бул тууралуу Дүйнөлүк саламаттык сактоо уюмунун генералдык директору Тедрос Адханом Гебрейесус маалымат жыйында билдирди.
Анын айтымында, аалам коронавирусту жеңүү үчүн буга чейин азыркыдай дурус абалда боло элек болчу.
ДССУ жетекчиси өткөн жумада 2020-жылдын март айынан берки өлүмдүн эң аз учуру катталганын белгиледи.
"Пандемиядан биротоло арылуу үчүн азыркыдай дурус абалда боло элек болчубуз. Максатыбызга толук жете элекпиз, бирок жакындап калдык", — деди Гебрейесус.
Ал өлкөлөрдү тобокелчилик тобундагыларды жапырт эмдөөгө каражат салууга чакырды.