БИШКЕК, 14-сен. — Sputnik. Энергетика министрлигиндеги айрым кызматкерлер тарабынан жасалган мыйзам бузуулардын натыйжасында мамлекетке 22 миллион сом, ал эми кылмыш иштери боюнча жалпысынан 889 миллион сом зыян келтирилген. Бул тууралуу Башкы прокуратуранын маалымат кызматы кабарлады.
Билдирмеге караганда, прокуратура министрликти текшерип, жыйынтыгында мекемеде жана анын түзүмдүк уюмдарында мыйзамдар, президенттин жарлыктары, Коопсуздук кеңешинин чечимдеринин талаптары бузулганы аныкталган.
"Бул боюнча прокуратура органдары 132 прокурордук чара көрүү актысын киргизип, мамлекетке 22 миллион 150 миң 218 сом өндүрүлгөн. Мындан тышкары, Энергетика министрлигинин жана анын түзүмдүк бөлүмдөрүнүн айрым кызмат адамдары тарабынан жасалган кылмыштардын негизинде 32 кылмыш иши козголуп, келтирилген зыяндын жалпы суммасы 889 миллион 54 миң 197 сомду түздү", — деп айтылат маалыматта.