БИШКЕК, 13-сен. — Sputnik. "Гавайи" эс алуу жайынын ээси, "Үмүт и Ко" компаниясынын негиздөөчүлөрүнүн бири Журат Абдуллаевге козголгон кылмыш ишинин алкагында республиканын бюджетине 800 миллион сомдон ашык акча чегерилди. Бул тууралуу УКМКнын маалымат кызматы кабарлады.
Эске салсак, августта ишкер ок атуучу курал жана жардыруучу заттарды сактаган деген шек менен кармалып, андан БРДМ-2 машинасы 7,62 калибрлүү "Калашников" танк пулемёту менен, мындан сырткары, курал, ок-дары, жарылуучу каражаттар (Ф-1 гранатасы), сайсыз мылтык жана желим ок атуучу, сатууга тыюу салынган түрдүү калибрдеги куралдар алынган. Кийинчерээк иш бөлмөсүнөн жалпы суммасы 822 миллион сомго барабар ар кыл валюта түрүндөгү акча, ок-дары жана баңгизат табылган.
УКМК тергөө учурунда Абдуллаевдин демилгеси менен күнөөсүн мойнуна алуу боюнча келишим түзүлгөнүн айтып, иш сотко өткөнүн билдирди.
12-сентябрда Биринчи май райондук сотунун өкүмү менен ишкер күнөөлүү деп табылып, жаза катары 100 000 сом айып пул төлөө каралган. Атайын кызмат Абдуллаев ири суммадагы каражаттын булагын так көрсөтө албаганын айтып, тергөө жана соттук териштирүүнүн жыйынтыгы менен 800 миллион сомдон ашык акча бюджетке которулуп, ар кандай курал-жарак, ок-дары, согуштук техника ИИМдин карамагына өткөрүп берилгенин кошумчалады.