Спортчунун маегин Бириккен күрөш дүйнөсү уюму жарыялады. Ал жеңишин Кыргызстанга, ага кошуп машыктыруучусу Улукбек Карачолоковдун көзү өтүп кеткен атасына арнай турганын айтты.
"Жакында эле Улук агайымдын атасы дүйнө салды, жеңишимди ага арнайм. Себеби ал мыкты машыктыруучуну тарбиялап чоңойткон. Мен абдан ыраазымын", — деди балбан.
Махмудов кыргыз күрөш мектеби эмнеге жөндөмдүү экенин көрсөткүсү келип, натыйжада реванш алганын белгиледи. Себеби финалдагы атаандашы венгриялык Золтан Леваини бир жолу жеңип, кийинкисинде жеңилип калган болчу.
Ошондой эле балбан аягында агайлары Мейрамбек Ахметов, Улукбек Карачолоков менен желекти көтөрүп килемди айланганы боюнча дагы айткан.
"Машыктыруучуларсыз мындай ийгиликке жетүү кыйын, андыктан бул баарыбыздын жеңишибиз, демек, биргеликте белгилешибиз керек", — деди дүйнө чемпиону.
Ал эми КТРК Спорт телеканалына берген маегинде Махмудов жеңишке досу Жоламан Шаршенбеков жол ачканын белгиледи.
"Жоламан досумдан үлгү алгам, мага дүйнө чемпиону болууга жол ачып, үйрөтүп келген. Ал дагы күрөшөт (бүгүн, 12-сентябрда — ред.) мен ага чын жүрөктөн ишенем, анткени Жоламан командабыздын лидери", — деди Махмудов.
Ошону менен катар башкы машыктыруучусу Мейрамбек Ахметов Акжол акжолтой болгонун айтып, Кыргызстандан дагы да көп баатырлар чыгарына ишеним артты.