БИШКЕК, 8-сен. — Sputnik. Жогорку Кеңештин депутаты Улан Бакасов жашы жете элек, 18 жашка чыга элек балдарды зордуктагандарды хирургиялык жол менен бычып салуу мыйзам долбоорун сунуштады. Анын демилгеси парламенттин сайтында коомдук талкууга коюлду.
Долбоордун маалыматтык негиздемесинде жыл башынан баштап жашы жете элек балдарга карата жасалган зомбулук маселеси резонанс жаратып жатканы белгиленген.
"Мамлекет балдарды зомбулуктун бардык түрлөрүнөн абсолюттук коргоону камсыз кылышы керек. Ал үчүн педофилия боюнча жоопкерчиликти күчөтүү шарт. Албетте, педофилдер өлүм жазасына татыктуу, бирок ага Конституцияда тыюу салынган. Андыктан азырынча ушундай гана катаал жазаны колдоно алабыз", — деп жазылат документте.
Депутат атайын дарыларды берүү, ийне саюу аркылуу жасалган химиялык кастрация кымбатка турат деп эсептейт. Бул натыйжасыз жана бюджетке да зыян келтирерин айтууда. Андыктан педофилдерди хирургиялык жол менен бычып салууну сунуштаган.
Хирургиялык кастрация репродуктивдик органды алып салып, хирургдардын кийлигишүүсү менен жүзөгө ашырылат. Кастрация жазык аткаруу же саламаттыкты сактоо органдарынын медициналык мекемелеринде жүргүзүлөт. Депутат мындай тажрыйба Чехия менен Нигерияда колдонулары белгиленген.
Хирургиялык кастрация психикалык жактан оорулуу адамдарга колдонулбайт. Акыл-эси жайында эмес деген корутундуну эксперттик комиссия текшергенден кийин чыгарып берет. Мындай категориядагы жарандар эки жылга чейинки мөөнөткө эркиндигинен ажыратылат.